Avtonomiyanın uşak başçalarında Üüretim bakannıın iniţiativasına görä «Halk oyunnarı aftası» geçti. Terbiedicilär, analar-bobalar, dädular hem babular uşaklara halk oyunnarın kurallarını annattılar hem bu oyunnarı birliktä onnarnan oynadılar.
“Kuran”, “Aşık”, “Saklambaç”, "Cici", «Mari-mari kız», "Buzaa almayınca", “Daullan, zurnaylan”, “İplik”, "Köör çöpüş", "Çölmekçi", "Bızz", "Eşecik", "Pınarcık", "Çelik", "Bordeycik", "Elim, elim üstündä..." – bunnar hepsi gagauzların halk oyunnarı. Şindi onnar için, hem nasıl onnarı oynamaa var nasıl, evlad boyları bilerlär. Bu yapıldı uşak başçaların izmetçilerin, anaların-bobaların hem däduların, babulrın hatırınnan.
“Şükür ederiz herbirini, kim bu ii işä katıldı. Butakım, adetlerimizi, kulturamızı ilerledriz, gagauzluumuzu koruyȇrız” – çizgiler Gagauz Erin üüretim bakannıı.
Uşak başçaları facebook.com saytında, kendi sayfalarında #Gagauzhalkoyunnarıuşakbaşçasında hem #halkoyunnarı hȇştȇglarını kullanrak patretlärlän hem kısa videolarlan paylaştılar. Butakım, herbirin var kolayı onnarı görmää. Onnardan belli, ani uşaklar büük havezlän hem meraklan halk oyunnarını oynȇȇrlar.

Bundan kaarä, «Halk oyunnarı aftası» – bu bir konkurs. Sonuçta Üüretim bakannıı en ii videoları seçecek, konkursu tarayannarı belli edeck. I, II hem III erleri alan uşak başçalarına bakannık diplom hem ödül verecek.