Aprelin 27-dä Ay Boba Mihail Çakirin duuma günündä “Ana dili” yortumuzu bakacȇz. Gagauz Erin Üüretim baş bakannıı Ana dilimizä adalı olayları plannadı. Onnar aprel ayın süresindä üüretim kurumnarımızın uurlarında hem da bütün avtonomiynın uurunda geçirilerlär. Bu sayıda:

- konkurslar;

- avtonomiya uurunda açık derslär;

- klastan dışarı derslär;

- literatura okumakları;

- yazıcılarımıza, peetçilerimizä adalı sergilär;

- genel diktant.

Aprel ayın 1-dä “Gülüş günü” yortusundan başladık. Üürenicilär kısa-kısa videoları çıkardılar, cümbüş Ana dilimizdä annattılar.

Aprelin 3-dä 3-9 klasların üürenicileri “Gagauz halkının istoriyası, adetleri, kulturası” predmetindä onlayn-testi yazdılar.

 Aprelin 13-dä avtonomiyanın hepsi üüretim kurumnarında üüredicilär evlad boylarımıza Saveliy Ekonomov için annattılar. Anılmış yazıcı, folklorcu, kinocu hem pedagog bu yıl 95 yaşını tamannayacȇydı. 

Bu derslerdän kaarä Üüretim bakannıı konkursu haberledi. 5-12 klasların üürenicileri Saveliy Ȇkonomov için videoları çıkardılar. Bu videoları facebook soţila mediasında #AnaDilimiz #GagauziyaVideoKonkursu hȇştȇglarını kullanarak, bulup siiretmää var nasıl.

Hepsi katılannara Gagauziya Üüretim bakannıın adından diplomnar verileceklär. Konkurs komisiyası en ii videoları seçecek.  Onnarın kurucularına bakannık baaşış verecek.

Aprelin 1-dän 22-dän “Gagauz Erin özel statusu için” kanonun kabledilmesinin 30-cu yıldönümünä adalı konkurs geçriler. Ona katlmaa isteyän üürenicilär avtonomiyanın kuruluşuna adalı logotipı kursunnar lääzım.

Aprelin 19-da uşak başçaların terbiedicileri "Dillerin Gökușaa" olayını geçirecelär.

Aprelin 8-dän 30-dan uşak başçalarımızda bilingval üüretim sistemasına görä «Uşakların masal dünnesi» konkursu geçiriler. Onun sınırlarında bu kurumnarda teatru mini-spektaklileri gagauz hem rumın dillerindä koyulȇr hem gösteriler.

Aprel ayın 15-dän 19-dan  9-12 klasların üürenicileri «30 yıl birliktä, uslulukta, annașmakta» yaratma konkursuna katılabileceklär.

Aprelin 24-dä hepsi isteyennär Gagauz Dilindä Genel Diktantı yazabileceklär. Bu önemni bir konkurs. Bitkii yıllar ona çok kişi büük havezlän katılȇr. Onnar butakım hem kendi sevgilerini, saygılarını gagauz dilinä göstererlär.

Aprelin 26-da hepsi okullarda birleşik üürenmäk günü geçirilecek. O «30 yıl birliktä, uslulukta, annașmakta» temasına adlı olacȇk.

Aprelin 27-dä «30 yıl birliktä, uslulukta, annașmakta» flȇşmob geçirilecek. Hep bu gün «Ana dili, halkın dili – halkın diri canıydır» regional gala-konţerti geçirilecek. Ona katılacȇklar gagauz dilinä adalı konkursların, olimpiadaların tarayıcıları.