Kıran ayın 11-dä Komrat gimnaziya-uşak başçasında Suleyman Demirel adına verildi klas dışandakı yortu temaya «Ana dilimiz, kulturamız – halkın zenginnii». Yortuyu hazırladı gagauz dili üüredicileri: Tabakar Olga hem Odnostalko Marina.

Geçti klas dışandakı yortu intelektual oyunu gibi. Uşaklar 5-nci klastan gösterdilär kendi logika uurunu türlü bölümnerdä. Açmaa hem kapamaa yortuyu yardımcı oldular küçük musaafirlär uşak-başçasından hazırlık grupasından, üüredici-terbiedici gagauz dilindä Kiosä Anna hem muzika öndercisi Ştiroy Mariya.

Urok üüredicilerin yardımınnan terbietti uşaklarda sevgi kendi Ana dilinä hem topraana, terbietti saygı gӧstermää vatandaşlarına, tanımaa hem saymaa gagauzların kulturasını.

Yarışmaya - açık ders konkursuna, angısını açıkladı Gagauz Yeri Genel üüretmäk müdurlüü, ilktän katıldı 11 okul Avtonomiyanın üç dolayından: Komrat dolayından, Çadır dolayından hem Valkaneş dolayından. Ama bir okulda hastalandı üüredici. O hızlı alışarsa, gelecek haftaya o da katılacek konkursa, da verecek açık urok.

Kıran ayın 22-dä Gagauz Yeri Genel üüretmäk müdurlüü geçirecek kutlamak meropriyatiyasını, angısına katılacıklar hepsı pay alannarı hem enseycileri.