Bilingval üüretim sistemasını kaavileştirmäk için Gagauz Erin uşak başçalarında «Uşakların masal dünnesi. Copiii și lumea teatrului» konkursu geçiriler. Onun sınırlarında bu kurumnarda teatru mini-spektaklileri gagauz hem rumın dillerindä koyulȇr hem gösteriler.

        Bu işin gerçekleştirilmesindä pay alȇrlar uşak başçaların izmetçileri, uşaklar hem analar-bobalar. Spektakli için pyesa seçiler, kostümnär hazırlanıȇr.

        Uşaklar – pyesaların küçük kahramannarı, rollerini oynayarak, gagauz hem rumın dillerindä kendi becermeklerini göstererlär.

        Regional konkursu ilerleer. Aprel ayın 10 iki uşak başçasında spektaklilär gösterildi.

        Congaz küüyünün 5-ci uşak başçasında terbiedicilӓr barabar analarlan-bobalarlan hem uşaklarlan gagauz dilindӓ “Dӓdunun kızı hem babunun kızı” masalına görä spektaliyi gösterdilӓr. Atributlar hem dekoraţiyalar bıkadaradak gözäl olsunnar deyni uşakların anaları-bobaları çalıştılar, kurumun izmetçilerinä yardımcı oldular. Uşaklar büük havezlӓn spektakliyi siirettilӓr hem onda pay aldılar. Onnara deyni bu pek faydalıydı, çünkü kendi becermeklerini zenginneştirdilär.

Beşgöz küüyünün ”Güneşçik” uşak başçasında  “Kücük inat sıçancık” masalına görä spektakliyi kurdular hem dä gösterdilär. Spektakliyi kurmaa deyni S.Marşak yaratmasını kullandılar. Sonuçta gagauz dilinä uygun hem dä uşaklara deyni fydalı bir masal oldu. Bu iş gerçekleşsin deyni birlikär hem dä büük havezlän terbiedicilär, analar-bobalar hem dä uşacıklar işledilär. Herbiri kuvedinä görä bişeylär yaptı. 

Belli oldu, ani Ana sözü hem Ana sevdası - en paalı ne var bu dünnedä. Hem masalın baş fikiri uşaklara deyni bir ders gibi oldu. Onnar annadılar, ani pek önemni kendini ii götürmää, ana-bobayı seslemää.

Aktörlar gösterdilär üüsek uurda artistik becermeklerini. Masalın büülü içindekiliindä, aktörların hem personajların arasında sıkı baalantılar oldular. Rollär becerikli hem yakışıklı paylaşıldı, masus kişiya görä. Masalın dramatizaţiyası koyuldu gagauz hem romın dillerindä. Sözleşmäk situaţiaları hem modelleri pek becerikli, dooru kullanıldılar.

Bütün kolektivin yardımınnan, kuruldu gözäl dekoraţiyalar, kostümnär, kullanıldılar türlü yugun lääzımnı melodiyalar. Yaradıldı eni türkü: “Ana sevdası”.   

Masal, gerçektän pek meraklıydı, spektakli üüsek uurda geçti.

Kırlannar küüyünün “Güneşçik” uşak başçasında “Foişorul” masalını devlet dilindä gösterdilär. Küçük aktörlar sıradan siiredicileri hem dä komissiyanın azalarını mayıl eetilär. Onnar büük havezlän aktörculuk uurunda kendi becermeklerini gösterdilär. Bundan kaarä belli oldu, angı uurda uşaklar devlet dilini bilerlär.

Uşakların becermeklerini hem onnarı üüredän terbiedicilerin ustacılıını maasuz komissiya türlü kriteriyalara görä notalȇr:

• Uşaklarda gagauz hem rumın dillerindä söz kompetenţiyaların var olmasını;
• Artistizma, horeografiya becermeklerini;
• Kostümnerin, dekoraţiyaların, video hem audio materialların kullanmasını;
• Seçili pyesanın temasını hem uşaklara deyni faydalı olmasını;
• Repertuarın uşaklarının yaşına görä uymasını.

Sonuçta en ii uşak başçaları ödülleneceklär.

Gagauz Erin üüretim bakannıı şükür eder herbirini, kim «UŞAKLARIN MASAL DÜNNESİ. COPİİİ Șİ LUMEA TEATRULUİ» konkursuna katılȇr.