Açık derslär verildi okullarda: Kirsovo gimnaziyasında M. Tanasoglunun adına, Kongazın gimnaziyasında V. Topal adına, Kotovskiyin gimnaziyasında I. Sınkunun adına. Hepsi derslär geçti gagauz dilindä.

Kotovskiyin gimnaziyasında I. Sınkunun adına verildi urok gagauz dilinda hem literaturasında. Uroa hazırladı üüredici Komur Praskovya. Derstä açıklandı tema: «Dedelerin izlerindän. D. Kara Çoban «Fanatik». Urok-gezi geçti okulun muzeyindä. Onda pay aldılar küüyün aktivistleri, angıların yardımınnan taa deerindan açıklandı Avtonomiyanın kurulması. Uroon süresindä kullanıldı muzeyin eksponatları.Uşaklar gözäl hem dolu çıkışlar düzdülär gagauz dilinda.

Kongazın gimnaziyasında V. Topal adına urok verildi 4-cü klasta, üüredici Arnaut Mariya. Dersin temasıydı: «Evelki yaşamak büünkü bakışlan». Tema ardıldı gimnaziyanın muzeyinä «KONGAZ  KORAFLARI».

Uroon  başlantısına geldi musaafirlär üç memlekettän: Angliyadan, Romaniyadan hem Bulgariyadan, angılarını üürenicilär tanıştırdılar gagauzların evelki adetlerinnän. Üürenicilär, payılıp iki bölümä: «Aaraştırıcılar» hem «Etnograflar»,  kendi çalışmalarını  göstürdülär Kongaz küüyündä.  Ilk bölüm açıkladı bizä evelki evlerin yapılması  için, yaşayan odanın tertipleri için, giimneri için. Ikinci bölüm açıkladı gagauz karıların  izmetini evin içindä. Üürenicilär serbest, duygulu, büük havezlän urokta konuştular ana dilindä.

Kirsovo gimnaziyasında M. Tanasoglunun adına geçti integrir ders «Urok-gezi şkola muzeyindä» gagauz dilindä hem gagauz halkın istoriya, kultura hem adetlerindä. Uroa 9-cu klasta geçirdi üüredici Boykova Mariya. Üürenicilär üürendilär Gagauziyanın, Baş küüyün, gimnaziyanın istoriya sayfalarını.

Hepsi uroklarda, angıları büün geçtilär okullarda, terbiettilär uşaklarda sevgi kendi Ana dilinä, küüyünä, topraana. Meraklandırdılar gagauzların tradiţiyalarınnan, terbiettilär saygı gӧstermää vatandaşlarına, tanımaa hem saymaa gagauzların adetlerini.