“Guguşçuk” uşak jurnalın 14-cu kolverimi basıldı. Tirajın bir payını Gagauz Erinin Üüretim bakannıı okullara daattı, bir payını da, bu jurnalı hazırlayan fililogiya bilgileri doktoru Güllü Karanfil okullara gelip kendi ellerinnän uşaklara baaşladı. Bulundu o Avdarma, Kiriet hem Beşgöz küülerindä.

“14-cü nomerin tiraj sayısı herzamankısına bakarak taa çok oldu. Bu uurda Gagauz Erin kuvetlerindän kaarä bana Belek universiteti yardımcı oldu.  Bän 2 hem 3 klasların üürenicilerinä jurnal verdim. Uşaklar baaşışıma sevindilär. Bu jurnaları onnar evä aldılar. Onun sayfalarında türlü annatmaları, şiirleri, blemeyeceleri, krosvordları bulabileceklär. Analarınnan-bobalarınnan birliktä yada tekbaşına türlü sınışları, gagauz dilini taa islää bilmää deyni, yapabileceklär” – söledi Güllü Karanfil.

Var onun neetindä başk küülerin okullarına da musaafirlää gelmää, uşalalrlan gagauzça lafetmää hem “Guguşçuk” jurnalın eni nomerini onnara baaşlamaa.

Gözäl renkli, çok resimni “Guguşçuk”– Karanfil Güllünün ideyası. Bu juranlın hazırlamasını hem basmasını o birkaç yıl geeri kendi üstünä aldı. Baş neet – ana dilimizi ilerletmää, aylelerdä, uşakların arasında onun kullanmasını genişletmää.

Jurnalın sayfalarında türlü temalara görä kısa annatmalar, kolay üürenilän şiirlär, uşakları meraklandıran soruşlara cuvaplar, skanvordlar, bilmeycelär, türkü lafları muzika notalarınnan, logika labirintleri, boyamalar hem ta çok-çok, gagauz dilinin kolay hem başarılı üürenmää yardımcı olan materiallar var. Hepsi materiallar eni. Butakım gagauz dilindä üüretmäk materialları enilener.

 “Guguşçuk” jurnalın 15 kolverimi may hazır. Dizayner donadȇr sayfaları. Güz nomeri dä tezlää basılacȇk. Okullara hem uşak başçalarına daadılacȇk.

Getirderiz akıllarınıza, ani uşak jurnalın syfalarında kendi materiallarını tiparlȇȇrlar: Güllü Karanfil, Valentina Bujilova (Hacioglo), Olga İvoglo-Kılçık, Kirill Kılçık, Elena Karamit, Todur Zanet, Sofiya Koca, Todur Marinoglo, Galina Danacı, Aleksandra Kristova h.b.

“Guguşçuk” jurnalı için taa geniş informaţiyayı BURADA bulabilirsiniz.